På ei tilskiping på Iris Scene 28. april, fekk Harry Solberg Kongens fortenestemedalje.
![Foto visar ordførar Roald Aga Haug som overrekker medaljen til Harry Solberg. Foto: Elin Myran.](https://odda-mallag.no/wp-content/uploads/2023/07/Skjermbilde-2023-07-07-kl.-10.58.26-1024x579.png)
Ordførar Roald Aga Haug overrekte medaljen. Harry fekk påskjøning for samfunnsbyggjande arbeid både som lærar og seinare som rektor, men fyrst og fremst for idealistisk arbeid – særleg i idrottslag og i mållag.
![Foto visar at Roald held fram medaljen så publikum får sjå. Foto: Elin Myran](https://odda-mallag.no/wp-content/uploads/2023/07/Skjermbilde-2023-07-07-kl.-10.57.21-1024x737.png)
Harry har vore styremedlem i Odda Mållag sidan 1967, bortsett frå nokre få år då han arbeidde på skulen i Kinsarvik. I 19 av desse åra har han òg vore formann. I 1987, då Noregs Mållag hadde landsmøtet i Odda, organiserte og leidde han arbeidet med tilskipinga.
![Foto visar Roald som held tale til dei frammødte på Iris Scene. Foto: Erlin Myran.](https://odda-mallag.no/wp-content/uploads/2023/07/Skjermbilde-2023-07-07-kl.-10.57.59-1024x807.png)
Harry er ei oppkome av gode idear, har uvanleg stor arbeidskapasitet og er ein dyktig organisator. Heilt frå starten i 1978 har Harry dessutan vore drivkrafta i utgjevinga av det lokalhistoriske skriftet Odda i manns minne, og til hausten kjem dette skriftet ut med den 32. utgåva.
Harry Solberg er heidersmedlem både i Odda Idrettslag og i Odda Mållag. I 1996 fekk han Målprisen og i 2002 fekk han Kulturprisen til Odda kommune. Då han fekk påskjøninga, takka han kona si, Turid Asting Solberg, for hjelp og støtte i arbeidet.
![Ordførar Roald Aga Haug gratulerer Harry Solberg med prisen. Foto: Knut O. Dale.](https://odda-mallag.no/wp-content/uploads/2023/07/Skjermbilde-2023-07-06-kl.-12.42.20.png)
![Bilete av Harry Solberg som får Kongens fortenestemedalje. Foto: Knut O. Dale.](https://odda-mallag.no/wp-content/uploads/2023/07/Skjermbilde-2023-07-07-kl.-10.51.57.png)
Odda Mållag gratulerer Harry med fortenestemedaljen!